గతంలో బిగ్బాస్ తెలుగు హోస్ట్ నాగార్జున వచ్చి ఈసారి బిగ్బాస్ ఇలా ఉండబోతోంది.. అలా ఉండబోతోదంటూ మాటలు చెప్పేవారు. కానీ అంత ఉండేది కాదు.. ఈసారి మాటలు కాదు.. చేతల్లో చూపిస్తున్నారు. మామూలు ట్విస్ట్లు కాదవి. ఒక్క తెలుగులోనే కాదు.. ఏ భాషలోనూ ఇలాంటి ట్విస్ట్లు ఉండి ఉండవేమో. కంటెస్టెంట్ల ఎంపిక నుంచి ప్రతిదీ వావ్ అనిపించేలానే ఉంది. మొత్తమ్మీద ఝాన్సీ వంటి ఒకరిద్దరు తప్ప మిగిలిన వారంతా బీభత్సమైన కంటెంట్ ఇస్తున్నారు. బిగ్బాస్ నిర్వాహకులకు చేతి నిండా పని చెబుతున్నారు. ఇక శనివారం అంటే బిగ్బాస్ ప్రేక్షకులకు పండగే. హోస్ట్ నాగార్జున వచ్చి మొట్టికాయలు వేయాల్సిన వారికి వేసి.. పొగడాల్సిన వారిని పొగుడుతూ ఉంటారు.
ఈ ఎపిసోడ్ కోసం బిగ్బాస్ ప్రేక్షకులు వారమంతా ఎదురు చూస్తూ ఉంటారు. ముఖ్యంగా ఈసారి తొలి వారం నాగ్ వచ్చి ఎవరికి మొట్టికాయలు వేస్తారనేది ఆసక్తికరంగా మారింది. త్రిగుణ్ని దారిలో పెడితే కంటెంట్ రాదు.. అలాగని పెట్టకుంటే అతను ఇంకా బ్యాడ్ అయిపోతాడు. అలాగే వర్షిణి, కృష్ణుడు, సుధీర్ వంటి వారందరినీ దారిలో పెట్టాలి. మరి దీనిని నాగ్ ఎలా డీల్ చేస్తారనేది ఆసక్తికరంగా మారింది. దీంతో ప్రేక్షకులంతా శనివారం కోసం ఆసక్తిగా ఎదురు చూస్తున్నారు. ఇప్పటి వరకూ బిగ్బాస్ నుంచి ఒక్కటంటే ఒక్క ప్రోమో కూడా బయటకు రాలేదు. దీంతో ఉత్సుకత మరింత పెరుగుతోంది. ఇక ఈవారం ఇప్పటికే ఇద్దరు ఎలిమినేట్ అయి హౌస్ నుంచి వెళ్లిపోయారు. ఇప్పుడు మూడో ఎలిమినేషన్ జరుగనుంది.
ఇక ముచ్చటగా మూడో కంటెస్టెంట్ను మాత్రం ప్రేక్షకుల ఓటింగ్ ప్రకారం ఎలిమినేట్ చేయనున్నారు. మరి బయటి కొందరు రివ్యూవర్స్ పెట్టిన పోల్స్లో అయితే కృష్ణుడు బయటకు వెళ్లిపోతాడని ఉంది. దీంతో అంతా పెద్ద ఎత్తున మీమ్స్ పెట్టేశారు. ‘వినాయకుడు’ (కృష్ణుడు చేసిన తొలి చిత్రం) ప్రస్తుతం బిగ్బాస్ హౌస్లో ఉన్నాడని.. ఆదివారం నిమజ్జనమే అంటూ పెద్ద ఎత్తున మీమ్స్ వచ్చాయి. తీరా చూస్తే ఈ వారం ఎలిమినేట్ అయ్యేది కృష్ణుడు కాదట. అఫీషియల్ ఓటింగ్ ప్రకారం ఆయన లీస్ట్ నుంచి రెండో స్థానంలో ఉన్నారట. మరి కింది నుంచి ఫస్ట్ స్థానంలో ఉన్నది ఎవరో తెలుసా? సుధీర్ రెడ్డి. గేమ్ను అర్థం చేసుకోకుండా త్రిగుణ్ మాయలో ఉండిపోయి ఆటను సర్వనాశనం చేసుకున్నాడు. ఈ క్రమంలోనే సుధీర్ రెడ్డి హౌస్ నుంచి ఎలిమినేట్ కానున్నట్టు తెలుస్తోంది.
