అయ్యా మోహన్ బాబు గారు.. మీ రేంజ్ ఏంటి.. ఈ క్యారెక్టర్స్ ఏంటి సర్..?

మోహన్ బాబు.. ఈ పేరు వింటేనే తెలుగు ప్రేక్షకులకు ఒక పవర్ ఫుల్ వైబ్రేషన్ వస్తుంది. డైలాగ్ కింగ్ గా, కలెక్షన్ కింగ్ గా టాలీవుడ్ ఇండస్ట్రీలో ఆయన సృష్టించిన రికార్డులు అన్నీ ఇన్నీ కావు. అయితే ఇంతటి అద్భుతమైన నటుడు మోహన్ బాబును కేవలం తమ సినిమాల్లోకి తీసుకోవడం కాదు.. ఆయనలోని అసలైన నటుడిని, ఆయనకున్న మాస్ ఇమేజ్ ను వాడుకోవడం కూడా దర్శకులకు కచ్చితంగా తెలియాలి. దురదృష్టవశాత్తూ ఇప్పటి జనరేషన్ యువ దర్శకులకు మోహన్ బాబు నటన ఏంటో, ఆయన స్థాయి ఏంటో కనీసం ఐడియా ఉన్నట్లు కూడా అనిపించడం లేదు. ఒకప్పుడు ఆయన సినిమాలు ఎలా ఉండేవి, బాక్సాఫీస్ దగ్గర ఆయన పండించిన విలనిజం ఎలా ఉండేదో ఇప్పటి వాళ్లకు అర్థం కావట్లేదా లేక కావాలనే అలాంటి డల్ క్యారెక్టర్స్ ఆయన కోసం రాసుకుంటున్నారా అనేది సగటు ప్రేక్షకుడికి అంతుచిక్కని ప్రశ్నగా మారింది. ఆయనలోని ఫైర్ ను వాడుకోవడంలో ఇప్పటి డైరెక్టర్లు పూర్తిగా ఫెయిల్ అవుతున్నారనే చెప్పాలి.

ఒకప్పటి మోహన్ బాబు బ్లాక్ బస్టర్ సినిమాలను గుర్తు చేసుకుంటే ఆయన నట విశ్వరూపం ఏంటో స్పష్టంగా తెలుస్తుంది. అసెంబ్లీ రౌడీ, అల్లరి మొగుడు లాంటి సినిమాల్లో ఆయన యాటిట్యూడ్, పెదరాయుడు సినిమాలో ఆయన చూపించిన రాజసం, ఎం ధర్మరాజు ఎం.ఏ సినిమాలో ఆయన పలికించిన పవర్ ఫుల్ డైలాగులు, రాయలసీమ రామన్న చౌదరి లాంటి చిత్రాల్లో ఆయన స్క్రీన్ ప్రెజెన్స్ చూసి థియేటర్లలో జనాలు పూనకాలు వచ్చినట్లు ఊగిపోయేవారు. తనదైన స్టైల్ లో డైలాగ్ డెలివరీ చేస్తూ, ఎంత క్రూరమైన విలనిజంలో కూడా అద్భుతమైన ఎంటర్టైన్మెంట్ ను మిక్స్ చేసి ప్రేక్షకులను మెప్పించడం కేవలం మోహన్ బాబుకే చెల్లింది. అసలు మెయిన్ హీరోలకు దీటుగా విలన్ పాత్రలు పండించడంలో ఆయనకంటూ ఒక సెపరేట్ బెంచ్ మార్క్ ఉంది. అలాంటి గొప్ప సీనియర్ నటుడిని ఇప్పటి దర్శకులు చాలా సింపుల్ గా, ఎలాంటి కమర్షియల్ ఎలివేషన్ లేని సాదాసీదా పాత్రల్లో చూపిస్తూ ఆయన ఇమేజ్ కు తీవ్రంగా డ్యామేజ్ చేస్తున్నారు.

చాలా ఏళ్ల గ్యాప్ తర్వాత 2026లో మోహన్ బాబు ఏకంగా రెండు భారీ సినిమాలతో ప్రేక్షకుల ముందుకు వచ్చారు. చాలా కాలం తర్వాత తమ అభిమాన నటుడిని బిగ్ స్క్రీన్ మీద ఒక పవర్ ఫుల్ రోల్ లో చూడొచ్చని ఆయన అభిమానులు ఎంతో ఆశగా వెయిట్ చేశారు. కానీ తీరా సినిమాలు రిలీజ్ అయ్యాక థియేటర్లలో సీన్ పూర్తిగా రివర్స్ అయిపోయింది. ఆర్ఎక్స్ 100 ఫేమ్ దర్శకుడు అజయ్ భూపతి తీసిన ‘శ్రీనివాస మంగాపురం’ సినిమాలో కలెక్షన్ కింగ్ ను మునుపెన్నడూ చూడని విధంగా ఖతర్నాక్ గా వాడుకుంటాడని ఇండస్ట్రీ వర్గాలు కూడా అనుకున్నాయి. కానీ అందులో మోహన్ బాబుకు ఒక మామూలు తాత పాత్రను ఇచ్చి ఆయన గ్రేస్ ను పూర్తిగా పక్కన పెట్టేసాడు అజయ్ భూపతి. ఆ డల్ క్యారెక్టర్ చూసిన తర్వాత అసలు మా మోహన్ బాబు ఆ సినిమా ఎందుకు చేసాడో అర్థం కావడం లేదంటూ ఫ్యాన్స్ చాలా హర్ట్ అయ్యారు. ఆయన స్థాయికి ఆ పాత్ర ఏమాత్రం సరిపోలేదని విమర్శలు వచ్చాయి.

పోనీలే శ్రీనివాస మంగాపురం రిజల్ట్ అలా ఉంటే.. కనీసం డైరెక్టర్ శ్రీకాంత్ ఓదెల అయినా తన ‘ప్యారడైజ్’ సినిమాలో కలెక్షన్ కింగ్ విశ్వరూపం చూపిస్తాడేమో అని అభిమానులు కళ్లు కాయలు కాచేలా ఎదురుచూశారు. దసరా లాంటి బ్లాక్ బస్టర్ తీసిన డైరెక్టర్ కాబట్టి, ఆయన రస్టిక్ మేకింగ్ స్టైల్ కి మోహన్ బాబు విలనిజం తోడైతే స్క్రీన్ మీద రచ్చ మామూలుగా ఉండదని ఎక్స్పెక్ట్ చేశారు. కానీ ప్యారడైజ్ లో కూడా పరిస్థితి దాదాపు అలాగే తయారైంది. ఈ సినిమాలో ఏదో ఒకట్రెండు చోట్ల మాత్రమే మోహన్ బాబు మార్క్ మ్యానరిజమ్స్ కనిపించినా, ఓవరాల్ గా ఆయన పాత్ర పెద్దగా పేలలేదనే చెప్పాలి. సినిమా కథలో ఆయన క్యారెక్టర్ కు ఉన్న స్కోప్ చాలా తక్కువ ఉండటంతో పాటు, ఆయన క్యారెక్టరైజేషన్ లో సరైన డెప్త్ లేకపోవడంతో మోహన్ బాబు లాంటి సీనియర్ నటుడిని ఇలాంటి పాత్రకు ఎందుకు తీసుకున్నారో అని సినిమా చూసిన ప్రతి ఒక్కరూ పెదవి విరిచారు.

అయితే ఇక్కడ అందరినీ తొలిచేస్తున్న అసలు ట్విస్ట్ ఏమిటంటే, తనకు సరైన పాత్రలు వస్తేనే సినిమాలు చేస్తానని ఎన్నో ఇంటర్వ్యూలలో పదే పదే చెప్పే మోహన్ బాబు.. ఇంత సింపుల్ క్యారెక్టర్స్ ను ఎలా ఒప్పుకున్నాడనేది ఎవరికీ అర్థం కావడం లేదు. బహుశా ఈ యువ దర్శకులు ఏమైనా కథ చెప్పేటప్పుడు ఆస్కార్ రేంజ్ లో నెరేట్ చేసి, తీసేటప్పుడు మాత్రం ఆయనకు చుక్కలు చూపించారా అనే అనుమానం కలగక మానదు. నిజానికి ఇప్పుడు 75 ఏళ్ళ వయసులో ఉన్న మోహన్ బాబుకు డబ్బులతో అసలు పనే లేదు. అలాగని ఈ వయసులో ఆయన కొత్తగా ఇండస్ట్రీకి తనను తాను నిరూపించుకోవాల్సిన అవసరమూ ఏమీ లేదు. ఆయన చూడని సక్సెస్ లేదు, అందుకోని శిఖరాలు లేవు. కాబట్టి కనీసం ఇప్పట్నుంచైనా ఆయన తన పాత్రల ఎంపిక విషయంలో కాస్త ఎక్కువ కాన్సట్రేషన్ చేస్తే మంచిది. కేవలం తన స్థాయికి, తన ఇమేజ్ కు తగ్గ పవర్ ఫుల్ పాత్రలు వస్తేనే సినిమాలు ఓకే చేసి, ఆ కలెక్షన్ కింగ్ బ్రాండ్ వాల్యూను అలాగే నిలబెట్టుకోవాలని ప్రేక్షకులు మనస్ఫూర్తిగా కోరుకుంటున్నారు.