టాలీవుడ్‌లో ఇప్పుడు ఎక్కడ చూసినా ఒకటే సినిమా పేరు మార్మోగిపోతోంది.. అదే డోంట్ ట్రబుల్ ద ట్రబుల్. దర్శక ధీరుడు ఎస్ఎస్ రాజమౌళి తనయుడు ఎస్ఎస్ కార్తికేయ నిర్మాతగా మారి ఎంతో ప్రతిష్టాత్మకంగా తెరకెక్కిస్తున్న ఈ సినిమాపై మంచి అంచనాలున్నాయి. రాజమౌళి అనే బ్రాండ్ నేమ్ వెనక ఉండటంతో ఇండస్ట్రీ మొత్తం ఇప్పుడు ఈ ప్రాజెక్ట్ గురించే మాట్లాడుకుంటోంది. అక్టోబర్ 2న గాంధీ జయంతి కానుకగా ఈ సినిమా అత్యంత భారీ స్థాయిలో గ్రాండ్ గా థియేటర్లలోకి రాబోతోంది. రాజమౌళి ఫ్యామిలీ నుంచి వస్తున్న సినిమా కావడంతో, దీనికి ఉన్న క్రేజ్ అంతా ఇంతా కాదు. సాధారణంగా ఏ సినిమాకైనా ప్రమోషన్స్ కోసం దర్శక నిర్మాతలు హీరోల చుట్టూ తిరుగుతూ చాలా కష్టపడుతుంటారు. కానీ ఇక్కడ సీన్ రివర్స్ అయింది. ఏకంగా స్టార్ హీరోలే లైన్ లోకి వచ్చి క్యూ కట్టి మరీ ఈ సినిమాను ప్రమోట్ చేస్తుండటం ఇండస్ట్రీలో హాట్ టాపిక్ గా మారింది. కథపై ఉన్న నమ్మకం, కార్తికేయ మీద ఉన్న ప్రేమ టాలీవుడ్ స్టార్స్ అందరినీ ఒకే వేదికపైకి తీసుకొస్తున్నాయి.
ఈ సినిమా రిలీజ్ కు ముందే టాలీవుడ్ లోని పలువురు అగ్ర హీరోల కోసం స్పెషల్ స్క్రీనింగ్స్ వేశారు. ప్రస్తుతం ఇంటర్నేషనల్ స్టాండర్డ్స్ తో రాజమౌళి తెరకెక్కిస్తున్న వారణాసి సినిమా షూటింగ్ తో ఎంతో బిజీగా ఉన్న సూపర్ స్టార్ మహేష్ బాబు, కాస్త సమయం తీసుకుని మరీ ఈ డోంట్ ట్రబుల్ ద ట్రబుల్ సినిమాను చూశారు. సినిమా చూసిన వెంటనే ఆయన తన సోషల్ మీడియా ఖాతా ట్విట్టర్ ద్వారా అదిరిపోయే రివ్యూ ఇచ్చేశారు. ఇది కేవలం ఒక సినిమా మాత్రమే కాదని, థియేటర్లో ఫీల్ అవ్వాల్సిన ఒక అద్భుతమైన ఎక్స్పీరియన్స్ అని మహేష్ బాబు ఆకాశానికి ఎత్తేశారు. ముఖ్యంగా మలయాళ స్టార్ హీరో ఫహాద్ ఫాజిల్ యాక్టింగ్ నెక్స్ట్ లెవెల్ లో ఉందని ఆయన చేసిన పోస్ట్ ఇప్పుడు సోషల్ మీడియాలో సెన్సేషన్ గా మారింది. మహేష్ లాంటి సూపర్ స్టార్ స్వయంగా ఒక సినిమాను ఇంతలా మెచ్చుకోవడంతో, ఏమాత్రం హైప్ లేని వాళ్లకు కూడా సినిమాపై క్యూరియాసిటీ అమాంతం పెరిగిపోయింది. మహేష్ ట్వీట్ సినిమాకు పర్ఫెక్ట్ ప్రమోషనల్ బూస్ట్ ఇచ్చిందని చెప్పాలి.
ఇక రాజమౌళికి అత్యంత సన్నిహితుడు, గ్లోబల్ స్టార్ జూనియర్ ఎన్టీఆర్ కూడా ఈ సినిమాను చూసి తనదైన స్టైల్ లో రివ్యూ ఇచ్చారు. రాజమౌళి ఫ్యామిలీతో తారక్ కు ఉన్న బాండింగ్ గురించి, వాళ్ల మధ్య ఉన్న ఎమోషనల్ అటాచ్మెంట్ గురించి అందరికీ తెలిసిందే. ఆ చనువుతోనే సినిమా చూసిన ఎన్టీఆర్ చిత్ర యూనిట్ పై ప్రశంసల వర్షం కురిపించారు. ముఖ్యంగా ఫహద్ ఫాజిల్ పోషించిన సూరి పాత్ర ఆయనకు విపరీతంగా నచ్చేసిందని చెప్పాడు. యాక్టింగ్ లో ఎన్టీఆర్ ను మించిన వారు లేరంటారు, అలాంటి తారక్.. సూరిగా ఫహద్ నటన నుంచి తానెంతో నేర్చుకోవాలని అనిపించిందని చెప్పడం విశేషం. అంతేకాకుండా ఈ సినిమాలో దివ్య అనే చైల్డ్ క్యారెక్టర్ లో నటించిన సారా పాప గురించి కూడా ఎన్టీఆర్ ప్రత్యేకంగా మాట్లాడారు. ఆ పాప నటన అందరినీ కట్టిపడేస్తుందని, ఎమోషనల్ గా సినిమా చాలా స్ట్రాంగ్ గా ఉందని ఆయన ఇచ్చిన ఫీడ్ బ్యాక్ సినిమా రేంజ్ ను ఎక్కడికో తీసుకెళ్లింది.
ఈ సినిమాకు సంబంధించి కేవలం స్టార్ హీరోల రివ్యూలు మాత్రమే కాదు, బిజినెస్ లెక్కలు కూడా ట్రేడ్ వర్గాలకు షాక్ ఇస్తున్నాయి. రాజమౌళి దగ్గరి బంధువు అయిన శశాంక్ ఏలేటి ఈ సినిమాతో దర్శకుడిగా పరిచయం అవుతున్నాడు. తొలి సినిమాకే ఇంత మంది స్టార్లు సపోర్ట్ చేయడం శశాంక్ కు బాగా కలిసొచ్చే అంశం. ఇక నిర్మాత ఎస్ఎస్ కార్తికేయ బిజినెస్ ప్లానింగ్ అయితే మామూలుగా లేదు. తండ్రి దగ్గర నేర్చుకున్న ప్లానింగ్ మొత్తం ఇక్కడ వాడేస్తున్నాడు. సినిమాకు బడ్జెట్ ఎంతైతే పెట్టారో, అది కేవలం ప్రీ రిలీజ్ బిజినెస్ తోనే పూర్తిగా రికవరీ అయిపోయిందని ట్రేడ్ వర్గాల్లో గట్టి చర్చ జరుగుతోంది. థియేట్రికల్, నాన్ థియేట్రికల్ రైట్స్, ఓటీటీ హక్కులు అన్నీ హాట్ కేకుల్లా భారీ రేట్లకు అమ్ముడైపోయాయి. అంటే రిలీజ్ కు ముందే టేబుల్ ప్రాఫిట్స్ తో ఈ సినిమా బాక్సాఫీస్ బరిలోకి దిగుతోంది. రాజమౌళి పేరు ఉండటం, ఫహద్ లాంటి పెర్ఫార్మర్ ఉండటంతో రైట్స్ తీసుకోవడానికి బయ్యర్లు ఎగబడ్డారు.
మొత్తానికి అటు బిజినెస్ పరంగా, ఇటు బజ్ పరంగా డోంట్ ట్రబుల్ ద ట్రబుల్ సినిమా విడుదలకు ముందే సూపర్ హిట్ కళను సంతరించుకుంది. కేవలం మహేష్ బాబు, ఎన్టీఆర్ మాత్రమే కాకుండా మరికొంత మంది ఇండస్ట్రీ ప్రముఖులు కూడా ఈ సినిమా గురించి ఎంతో పాజిటివ్ గా మాట్లాడుకుంటున్నారు. ఫహాద్ ఫాజిల్ లాంటి వెర్సటైల్ యాక్టర్ మెయిన్ లీడ్ లో ఉండటం, శశాంక్ ఏలేటి డైరెక్షన్ లోని ఫ్రెష్ నెస్, రాజమౌళి ఫ్యామిలీ అండదండలు పుష్కలంగా ఉండటం, దానికి తోడు హార్ట్ టచింగ్ కంటెంట్ ఈ సినిమాను ఒక బ్లాక్ బస్టర్ దిశగా తీసుకెళ్తున్నాయి. అక్టోబర్ 2వ తేదీన ఈ సినిమా థియేటర్లలో ఎలాంటి సెన్సేషన్ క్రియేట్ చేయబోతోందో చూడాలని ప్రేక్షకులు ఎంతో ఆసక్తిగా ఎదురుచూస్తున్నారు. ప్రమోషన్స్ స్ట్రాటజీ నుంచి టేబుల్ ప్రాఫిట్స్ వరకు డోంట్ ట్రబుల్ ద ట్రబుల్ టీమ్ తీసుకుంటున్న అడుగులు ఇండస్ట్రీకి ఒక మంచి స్టడీ మెటీరియల్ లా మారాయి.
