ప్రముఖ నటి కలర్స్ స్వాతి (స్వాతి రెడ్డి) దర్శకుడు శ్రీకాంత్ నాగోతిని వివాహం చేసుకున్నారు. ఈ శుభవార్తను స్వాతి తన ఇన్‌స్టాగ్రామ్ ఖాతా ద్వారా అభిమానులతో పంచుకున్నారు. తమ వివాహ వేడుకకు సంబంధించిన అందమైన ఫొటోలను షేర్ చేస్తూ, “Hitched. 08-07-2026” అనే చిన్న క్యాప్షన్‌తో తమ కొత్త జీవితాన్ని అధికారికంగా ప్రకటించారు.
సోషల్ మీడియాలో వైరల్ అవుతున్న ఫొటోల్లో స్వాతి, శ్రీకాంత్ నాగోతి సంప్రదాయ హిందూ వివాహ పద్ధతుల్లో పవిత్ర అగ్ని సాక్షిగా వివాహ బంధంలోకి అడుగుపెట్టిన దృశ్యాలు కనిపిస్తున్నాయి. ఈ వివాహ వేడుక అత్యంత సన్నిహిత కుటుంబ సభ్యులు, స్నేహితుల సమక్షంలో నిరాడంబరంగా జరిగినట్లు తెలుస్తోంది.
ఇది స్వాతి జీవితంలో రెండో వివాహం. గతంలో ఓ పైలట్‌ను వివాహం చేసుకున్న ఆమె, కొన్నేళ్ల తర్వాత విడాకులు తీసుకున్నారు. అనంతరం ఇండోనేషియా నుంచి భారత్‌కు తిరిగి వచ్చిన స్వాతి సినిమాలు, వెబ్ సిరీస్‌లతో తన నటనా ప్రయాణాన్ని మళ్లీ ప్రారంభించారు.
ఈ సమయంలో దర్శకుడు శ్రీకాంత్ నాగోతితో ‘మంత్ ఆఫ్ మధు’ చిత్రంలో కలిసి పనిచేశారు. నవీన్ చంద్ర హీరోగా నటించిన ఆ చిత్రంతో ప్రారంభమైన వారి పరిచయం క్రమంగా ప్రేమగా మారి, ఇప్పుడు వివాహ బంధంతో కొత్త జీవితానికి శ్రీకారం చుట్టింది.
స్వాతి వివాహ ఫొటోలు సోషల్ మీడియాలో వైరల్ అవుతుండగా, సినీ ప్రముఖులు, అభిమానులు నూతన దంపతులకు శుభాకాంక్షలు తెలియజేస్తూ ఆనందం వ్యక్తం చేస్తున్నారు.
