‘ది ప్యారడైజ్’ ప్రమోషన్స్‌కు మోహన్ బాబు దూరం.. అదేనా అసలు కారణం..!

టాలీవుడ్ సర్కిల్స్ లో ప్యారడైజ్ సినిమా చుట్టూ జరుగుతున్న చర్చ అంతా ఇంతా కాదు. ముఖ్యంగా ఈ సినిమా రెమ్యునరేషన్స్ విషయంలో హాట్ టాపిక్ నడుస్తోంది. క్యాస్ట్ అండ్ క్రూలో దాదాపు ఎవరికీ కూడా మేకర్స్ సరిగ్గా పారితోషికాలు ఇవ్వలేదనే టాక్ బలంగా వినిపిస్తోంది. ఈ ఎఫెక్ట్ సినిమా ప్రమోషన్స్ మీద స్పష్టంగా కనిపిస్తోంది. సీనియర్ నటుడు మోహన్ బాబు లాంటి వారు కనీసం ప్రమోషన్స్ వైపు కన్నెత్తి కూడా చూడకపోవడం వెనుక ఉన్న అసలు రీజన్ ఇదేనని గుసగుసలు వినిపిస్తున్నాయి. ఆయనకు ముందుగా అగ్రిమెంట్ లో చెప్పిన రెమ్యునరేషన్ లో కేవలం సగం మాత్రమే మేకర్స్ చెల్లించారని, మిగతా బ్యాలెన్స్ విషయంలో క్లారిటీ లేకపోవడంతోనే ఆయన అలకబూని ప్రమోషనల్ ఈవెంట్స్ కు పూర్తిగా దూరంగా ఉన్నారనే ప్రచారం ఇండస్ట్రీలో గట్టిగానే జరుగుతోంది. సినిమాకు మెయిన్ పిల్లర్ లాంటి మోహన్ బాబు బయటకు రాకపోవడం సినిమా బజ్ మీద కూడా కాస్త నెగిటివ్ ఇంపాక్ట్ చూపిస్తుందని టాక్ నడుస్తుంది.

కేవలం మోహన్ బాబు మాత్రమే కాదు, ఈ సినిమా హీరోయిన్ కయాదు లోహర్ పరిస్థితి కూడా ఇంచుమించు ఇలాగే ఉంది. ఆమె రెమ్యునరేషన్ విషయంలో కూడా మేకర్స్ చాలా ఇబ్బంది పెట్టారని, అందుకే ఆమె కూడా ప్రమోషన్స్ కు డుమ్మా కొట్టాలని డిసైడ్ అయిందని తెలుస్తుంది.. కానీ సినిమా రిలీజ్ టైమ్ దగ్గర పడటంతో, హీరోయిన్ లేకపోతే మీడియాలో రాంగ్ సిగ్నల్స్ వెళ్తాయని భయపడిన మేకర్స్, చివరి నిమిషంలో ఆమెను ఎలాగోలా బుజ్జగించి తీసుకువచ్చారని సమాచారం. పాపం ఆమె కూడా ఏదో ఒక రకంగా కాంప్రమైజ్ అయి, చాలా మొక్కుబడిగా ఒకే ఒక్క ఇంటర్వ్యూ ఇచ్చి, ఆ తర్వాత ప్రీ రిలీజ్ ఈవెంట్ లో తళుక్కున మెరిసి తన డ్యూటీ అయిపోయిందనిపించేసుకుంది. ఇలా సినిమాలో మెయిన్ లీడ్స్ అంతా రెమ్యునరేషన్స్ ఇష్యూస్ తో అప్సెట్ అవ్వడం ప్యారడైజ్ టీమ్ కు ఒక పెద్ద తలనొప్పిగా మారిపోయింది. ఒక భారీ పాన్ ఇండియా రేంజ్ సినిమాకు ఇలాంటి బ్యాక్ గ్రౌండ్ స్టోరీలు నడవడం చూసి ఆడియన్స్ కూడా కాస్త కన్ఫ్యూజ్ అవుతున్నారు.

ఇక ఈ సినిమా విషయంలో హీరో నాని వ్యవహరించిన తీరు కూడా ఇప్పుడు చర్చనీయాంశంగా మారింది. దర్శకుడు శ్రీకాంత్ ఓదెల మీద ఉన్న నమ్మకంతో ఒక టైమ్ వరకు ఆయన అడిగిన ప్రతీ దానికి, చెప్పిన ప్రతీ విషయానికి నాని ఓకే అంటూ సపోర్ట్ చేస్తూ వచ్చారు. కానీ మేకింగ్ లో విపరీతమైన జాప్యం జరగడం, బడ్జెట్ హద్దులు దాటిపోవడంతో ఫైనాన్షియల్ గా ఇబ్బందులు మొదలయ్యాయి. ఒక దశలో ఈ డిలే కారణంగా సినిమా భారీ ఓటీటీ డీల్ కూడా క్యాన్సిల్ అయ్యే పరిస్థితి రావడంతో నాని సీరియస్ అయినట్లు తెలుస్తోంది. అందుకే సినిమాకు కనీసం ఒక ప్రాపర్ థియేట్రికల్ ట్రైలర్ కూడా కట్ చేయకుండానే హడావిడిగా రిలీజ్ కు రెడీ చేసేశారు. అసలు ఈ సినిమా మార్చి 26న రావాల్సింది, అక్కడి నుంచి మే నెలకు వెళ్లి, ఫైనల్ గా సెప్టెంబర్ 24కి షిఫ్ట్ అయింది. మళ్లీ ఏమాత్రం రిలీజ్ డేట్ మార్చినా డిజిటల్ రైట్స్ పరంగా కోట్లలో నష్టం వస్తుందని పసిగట్టి, ఎలాగైనా సరే అదే డేట్ కు సినిమాను లాక్ చేసి ప్రేక్షకుల ముందుకు తీసుకువస్తున్నారు.

రెమ్యునరేషన్స్, డిజిటల్ డీల్స్ మాత్రమే కాకుండా థియేట్రికల్ బిజినెస్ పరంగా కూడా నిర్మాత సుధాకర్ చెరుకూరి చాలా పెద్ద రిస్కులు తీసుకుంటున్నారని ట్రేడ్ వర్గాల్లో జోరుగా వినిపిస్తోంది. సినిమా బడ్జెట్ భారీగా పెరిగిపోవడం, దానికి తగ్గట్టుగా మార్కెట్ నుంచి రికవరీ రాకపోవడంతో టేబుల్ ప్రాఫిట్స్ మాట అటుంచితే కనీసం సేఫ్ జోన్ కు వెళ్లడమే కష్టంగా మారిందని అంటున్నారు. ముఖ్యంగా వైజాగ్ లాంటి అతిపెద్ద ఆంధ్రా ఏరియాల్లో కూడా ప్యారడైజ్ బిజినెస్ ఆశించిన స్థాయిలో జరగలేదని, చాలా తక్కువ రేట్లకే సినిమాను వదిలేశారని ఒక ఇంట్రెస్టింగ్ ఇన్ఫర్మేషన్ చక్కర్లు కొడుతోంది. దీనిపై ప్రీ రిలీజ్‌లో దిల్ రాజు సైతం హింట్ ఇచ్చారు. సాధారణంగా నాని సినిమాలకు ఆంధ్రా రీజియన్ లో మంచి డిమాండ్ ఉంటుంది, కానీ ఈసారి శ్రీకాంత్ ఓదెల తీసిన రా అండ్ రస్టిక్ కంటెంట్, కనీసం ట్రైలర్ కూడా లేకపోవడం వల్ల బయ్యర్లు కాస్త వెనకడుగు వేసినట్లు స్పష్టంగా అర్థమవుతోంది. దీనివల్ల నిర్మాత తన సొంత రిస్క్ మీద చాలా ఏరియాల్లో సినిమాను రిలీజ్ చేయాల్సిన పరిస్థితి ఏర్పడింది.

ఇక తెలంగాణ బాక్సాఫీస్ కు గుండెకాయ లాంటి నైజాం ఏరియా డీల్ కూడా చాలా కాంప్లికేటెడ్ గా జరిగినట్లు తెలుస్తోంది. నైజాంలో ఈ సినిమాను మైత్రి మూవీ మేకర్స్ డిస్ట్రిబ్యూట్ చేస్తున్నారు, కానీ వాళ్ళు కూడా నిర్మాతకు చాలా స్ట్రిక్ట్ కండిషన్స్ పెట్టి మరీ సినిమాను తీసుకున్నారట. అడ్వాన్సులు, రికవరీలు, షేర్ల విషయంలో పక్కా అగ్రిమెంట్లు చేసుకున్న తర్వాతే మైత్రి సంస్థ ప్యారడైజ్ రిలీజ్ కు గ్రీన్ సిగ్నల్ ఇచ్చింది. ఇలాంటి విపరీతమైన కండిషన్లు, ఫైనాన్షియల్ రిస్కులు, రెమ్యునరేషన్ గొడవలు అన్నింటి మధ్య ప్యారడైజ్ సినిమా సెప్టెంబర్ 24న థియేటర్లలో అడుగుపెడుతోంది. ఇంత నెగిటివిటీని, ఇన్ని సమస్యలను దాటుకుని మేకర్స్ అందరూ సేఫ్ అవ్వాలి అంటే ఈ సినిమాకు కేవలం హిట్ టాక్ వస్తే సరిపోదు, కచ్చితంగా ఒక భారీ బ్లాక్ బస్టర్ అవ్వాల్సిందే. బాక్సాఫీస్ దగ్గర కలెక్షన్ల సునామీ సృష్టిస్తేనే ఈ వివాదాలన్నీ మటుమాయం అవుతాయి, లేదంటే ఈ సినిమా టీమ్ కు రాబోయే రోజుల్లో మరిన్ని ఫైనాన్షియల్ ఇబ్బందులు తప్పకపోవచ్చు.