ఆగస్టు 7న థియేటర్లలోకి ‘కొరియన్ కనకరాజు’.. వరుణ్ తేజ్ పవర్‌ఫుల్ లుక్

మెగా ప్రిన్స్ వరుణ్ తేజ్ కథానాయకుడిగా నటిస్తున్న హారర్-కామెడీ ఎంటర్‌టైనర్ ‘కొరియన్ కనకరాజు’ విడుదలకు ముహూర్తం ఖరారైంది. దర్శకుడు మేర్లపాక గాంధీ రూపొందిస్తున్న ఈ చిత్రాన్ని యూవీ క్రియేషన్స్, ఫస్ట్ ఫ్రేమ్ ఎంటర్‌టైన్‌మెంట్ సంయుక్తంగా నిర్మిస్తున్నాయి. ప్రస్తుతం పోస్ట్-ప్రొడక్షన్ పనులు చివరి దశలో కొనసాగుతున్నాయి.

ఇప్పటికే విడుదలైన టైటిల్ గ్లింప్స్ సినిమాపై మంచి హైప్‌ను తీసుకొచ్చింది. హారర్, కామెడీ, కొరియన్ కల్చర్ అంశాలను వినోదాత్మకంగా మేళవించిన కాన్సెప్ట్ ప్రేక్షకులను ఆకట్టుకోగా, తొలి పాట ‘కంసంనిదా’ కూడా మంచి స్పందనను అందుకుంది.

తాజాగా చిత్రబృందం సినిమాను ఆగస్టు 7న ప్రపంచవ్యాప్తంగా విడుదల చేస్తున్నట్లు ప్రకటించింది. ఈ సందర్భంగా విడుదల చేసిన రిలీజ్ డేట్ పోస్టర్ సోషల్ మీడియాలో వైరల్ అవుతోంది. పోస్టర్‌లో వరుణ్ తేజ్ ఒక చేతిలో రక్తంతో తడిసిన కత్తి, మరో చేతిలో గ్రెనేడ్ పట్టుకుని అత్యంత స్టైలిష్‌గా కుర్చీలో కూర్చుని కనిపించారు. చుట్టూ కొరియన్ గ్యాంగ్‌స్టర్లు నిలబడి ఉన్నప్పటికీ, ఆయనలో కనిపించిన ధైర్యం, కాన్ఫిడెన్స్ పోస్టర్‌కు ప్రత్యేక ఆకర్షణగా నిలిచాయి. నియాన్ లైటింగ్‌తో రూపొందించిన విజువల్స్ సినిమా యాక్షన్, కామెడీ, థ్రిల్‌ల కలయికగా ఉండబోతుందనే సంకేతాలను ఇస్తున్నాయి.

రితికా నాయక్ కథానాయికగా నటిస్తున్న ఈ చిత్రంలో కమెడియన్ సత్య కీలక పాత్రలో కనిపించనున్నారు. ఎస్. థమన్ సంగీతం అందిస్తుండగా, మనోజ్ రెడ్డి కటసాని సినిమాటోగ్రఫీని నిర్వహిస్తున్నారు.

వినూత్నమైన కథ, భిన్నమైన టైటిల్, స్టైలిష్ ప్రెజెంటేషన్‌తో ఇప్పటికే ప్రేక్షకుల్లో ఆసక్తిని పెంచుకున్న ‘కొరియన్ కనకరాజు’ ఆగస్టు 7న ఎలాంటి సందడి చేస్తుందో చూడాలి. విడుదల తేదీ ప్రకటించడంతో పాటు చిత్రబృందం త్వరలోనే ట్రైలర్, మరిన్ని ప్రమోషనల్ అప్‌డేట్స్‌ను విడుదల చేయడానికి సిద్ధమవుతోంది.