విజయ్ ఆంటోనీ ప్రధాన పాత్రలో నటించిన ఎమోషనల్ ఫ్యామిలీ డ్రామా ‘వంద దేవుళ్లు’ ఓటీటీ ప్రేక్షకులను అలరించేందుకు సిద్ధమైంది. విజయ్ ఆంటోనీ పుట్టినరోజు సందర్భంగా తెలుగు ZEE5 ఈ చిత్రం డిజిటల్ రిలీజ్ను అధికారికంగా ప్రకటించింది. ఈ సినిమా ఈ ఆగస్టులో తెలుగు ZEE5లో స్ట్రీమింగ్ కానుండగా, ఖచ్చితమైన విడుదల తేదీని త్వరలో వెల్లడించనున్నట్లు ప్లాట్ఫామ్ తెలిపింది.
నిజ జీవిత సంఘటనల ఆధారంగా తెరకెక్కిన ‘వంద దేవుళ్లు’ థియేటర్లలో మంచి స్పందనను అందుకుంది. హృదయాన్ని హత్తుకునే కథ, బలమైన భావోద్వేగాలు, కుటుంబ బంధాలను అద్భుతంగా చూపించిన తీరు ప్రేక్షకులను ఆకట్టుకుంది.
ఈ సినిమాలో తన కుటుంబం కోసం జీవితాన్ని అంకితం చేసిన ఓ వితంతువు తల్లి కథను చూపించారు. నలభై ఏళ్ల వయసు దాటిన తర్వాత ఆమె మరోసారి పెళ్లి చేసుకుని కొత్త జీవితాన్ని ప్రారంభించాలని నిర్ణయించుకుంటుంది. అయితే సమాజం, బంధువులు, గ్రామస్థుల నుంచి ఆమెకు తీవ్ర వ్యతిరేకత ఎదురవుతుంది. అలాంటి సమయంలో తన తల్లి ఆనందమే ముఖ్యమని భావించి ఆమె నిర్ణయానికి అండగా నిలిచే కుమారుడి పాత్ర సినిమాకు ప్రధాన బలంగా నిలుస్తుంది.
మాతృత్వం, త్యాగం, కుటుంబ బంధాలు, మహిళల వ్యక్తిగత జీవితంపై సమాజం విధించే పరిమితులు వంటి అంశాలను హృద్యంగా ఆవిష్కరించిన ఈ చిత్రం థియేటర్లలో పాజిటివ్ టాక్తో మంచి విజయాన్ని నమోదు చేసింది. ఇప్పుడు అదే భావోద్వేగ అనుభూతిని ఓటీటీ ప్రేక్షకులకు అందించేందుకు సిద్ధమవుతోంది.
ఇటీవల ‘పరిమళ & కో’తో కుటుంబ ప్రేక్షకులను ఆకట్టుకున్న తెలుగు ZEE5, ఇప్పుడు ‘వంద దేవుళ్లు’తో మరో హృదయాన్ని తాకే కథను ప్రేక్షకుల ముందుకు తీసుకురానుంది. ఈ చిత్రం ఆగస్టులో తెలుగు ZEE5లో స్ట్రీమింగ్ కానుంది. విడుదల తేదీపై అధికారిక ప్రకటన కోసం అభిమానులు ఆసక్తిగా ఎదురుచూస్తున్నారు.
