సోషల్ మీడియా యాక్టివ్ అయ్యాక సెలబ్రిటీలకు ఎంత పాపులారిటీ దక్కుతుందో, అంతే స్థాయిలో ట్రోలింగ్ కూడా ఎదుర్కోవాల్సి వస్తోంది. ముఖ్యంగా హీరోయిన్ల పర్సనల్ విషయాలపై, వాళ్ళ బాడీ సైజులపై నెటిజన్లు చేసే కామెంట్స్ ఒక్కోసారి హద్దులు దాటుతుంటాయి. తాజాగా RX100 బ్యూటీ పాయల్ రాజ్‌పుత్‌కు కూడా ఇలాంటి చేదు అనుభవమే ఎదురైంది. తన బాడీపై అత్యంత జుగుప్సాకరంగా, అసభ్యంగా కామెంట్స్ చేస్తున్న ట్రోలర్స్‌పై ఈ భామ సీరియస్ గా ఫైర్ అయింది. గ్లామర్ ఫీల్డ్‌లో ఉన్నంత మాత్రాన ఎవరైనా ఏమైనా అనేయొచ్చా అంటూ సోషల్ మీడియా వేదికగా ట్రోలర్స్ కు దిమ్మతిరిగే కౌంటర్ ఇచ్చింది. అసలు ఏం జరిగిందంటే గత కొద్ది రోజులుగా పాయల్ రాజ్‌పుత్‌కు సంబంధించిన కొన్ని వీడియోలను సోషల్ మీడియాలో కొందరు పనిగట్టుకుని షేర్ చేస్తున్నారు. ఆ వీడియోల కింద ఆమె బాడీ స్ట్రక్చర్‌ను, సైజులను టార్గెట్ చేస్తూ అత్యంత అసభ్యకరమైన పదజాలంతో కామెంట్స్ పెడుతున్నారు.
కేవలం కామెంట్స్ మాత్రమే కాకుండా, వల్గర్ ఎమోజీలు, అసభ్యకరమైన సైగలతో కూడిన పోస్టులతో ఆమెను సోషల్ మీడియాలో తీవ్రంగా వేధిస్తున్నారు. ఒక హీరోయిన్ పబ్లిక్ అప్పీయరెన్స్ ఇచ్చినప్పుడు లేదా సోషల్ మీడియాలో ఏదైనా వీడియో పోస్ట్ చేసినప్పుడు దాన్ని పాజిటివ్ గా చూడకుండా, ఇలా చీప్ గా కామెంట్స్ చేస్తూ పైశాచిక ఆనందం పొందుతున్న ఆకతాయిల ఆటకట్టించడానికి పాయల్ స్వయంగా రంగంలోకి దిగింది. ట్రోలర్స్ చేస్తున్న ఈ వల్గర్ అటాక్స్ పై పాయల్ తన సోషల్ మీడియా పేజీలో చాలా స్ట్రాంగ్‌గా రియాక్ట్ అయింది. ఇలాంటి వీడియోలు షేర్ చేస్తూ, నా బాడీ మీద డిస్గస్టింగ్ కామెంట్స్ చేస్తున్న వాళ్ళందరినీ చూస్తే అసహ్యం వేస్తోంది, మీకు కనీసం సిగ్గు లేదా అంటూ పాయల్ ఘాటుగా ప్రశ్నించింది. నా బాడీ, నా సైజ్ అనేది నా ఇష్టం, అది నా గర్వకారణం అని ఆమె గట్టిగా బదులిచ్చింది.
నా దేహకృతి అనేది మీ పబ్లిక్ డిబేట్‌లకు, మీ చెత్త ఒపీనియన్స్‌కు, మీ వల్గారిటీకి సంబంధించిన విషయం అస్సలు కాదు అని తేల్చి చెప్పింది. ఎవరి లిమిట్స్ లో వాళ్ళుండాలని, పక్కవాళ్ళ విషయాల్లో తలదూర్చకుండా మీ పనేంటో మీరు చూసుకోండి అంటూ బాడీ షేమింగ్ అనే ట్యాగ్స్ వాడుతూ అలాంటి వాళ్ళకు పాయల్ స్ట్రాంగ్ వార్నింగ్ ఇచ్చింది. ఈ ఇష్యూను కొంచెం డీప్ గా అనలైజ్ చేస్తే, గ్లామర్ ఇండస్ట్రీలో హీరోయిన్ల పరిస్థితి ఎంత దారుణంగా మారిపోయిందో అర్థమవుతుంది. హీరోయిన్లు కాస్త బొద్దుగా మారినా, లేదా స్లిమ్ గా అయినా సరే వెంటనే నెటిజన్లు వాళ్ళను బాడీ షేమింగ్ చేయడం ఒక ట్రెండ్ గా మారిపోయింది. వాళ్ళూ మనుషులే, వాళ్ళకూ ఎమోషన్స్ ఉంటాయనే కనీస ఇంగిత జ్ఞానం లేకుండా కొందరు ప్రవర్తిస్తున్న తీరు నిజంగా బాధాకరం.
అయితే చాలా మంది హీరోయిన్లు మనకెందుకులే అంటూ ఇలాంటి ట్రోల్స్ చూసి సైలెంట్ గా ఇగ్నోర్ చేస్తారు. కానీ పాయల్ రాజ్‌పుత్ లాంటి వాళ్ళు ధైర్యంగా ముందుకు వచ్చి, బాడీ షేమింగ్ కు వ్యతిరేకంగా స్వరం పెంచడం అనేది నిజంగా అప్రిషియేట్ చేయాల్సిన విషయం. పాయల్ ఇచ్చిన ఈ కౌంటర్ తో ఇకముందు ఇలాంటి చీప్ కామెంట్స్ చేసే వాళ్ళకు ఒక భయం అనేది కచ్చితంగా వస్తుంది. ఇక పాయల్ రాజ్‌పుత్ కెరీర్ విషయానికి వస్తే, తెలుగు ఇండస్ట్రీలో RX100 సినిమాతో సెన్సేషనల్ హిట్ అందుకుని ఓవర్ నైట్ స్టార్ గా మారిపోయింది. ఆ తర్వాత వెంకీ మామ లాంటి మల్టీ స్టారర్ సినిమాలో కూడా నటించి మెప్పించింది. మూడేళ్ళ కింద డైరెక్టర్ అజయ్ భూపతి తెరకెక్కించిన మంగళవారం సినిమాలో అద్భుతమైన నటనతో క్రిటిక్స్ తో పాటు ఆడియన్స్ నుంచి మంచి అప్లాజ్ అందుకుంది. గతంతో పోలిస్తే సినిమాల పరంగా స్పీడ్ కాస్త తగ్గించినప్పటికీ, ఈ అమ్మడు సోషల్ మీడియాలో మాత్రం ఫుల్ యాక్టివ్ గా ఉంటూ ఫ్యాన్స్ కు ఎప్పుడూ టచ్ లోనే ఉంటోంది. తెరపై బోల్డ్ రోల్స్ తో ఆకట్టుకునే పాయల్, రియల్ లైఫ్ లోనూ అంతే బోల్డ్ గా ట్రోలర్స్ కు బుద్ధి చెప్పిన తీరు ఇప్పుడు ఇండస్ట్రీలో హాట్ టాపిక్ గా మారింది.
