The Paradise Review
బ్లాక్ బస్టర్ ‘దసరా’ అనంతరం నేచురల్ స్టార్, శ్రీకాంత్ ఓదెల కలయికలో రూపొందిన ప్రాజెక్ట్‌పై తారాస్థాయిలో అంచనాలున్నాయి. ఆ బజ్‌ను ఈ చిత్రం ఏ మేరకు అందుకుందో పరిశీలిద్దాం.
కథ:
దేశానికి విముక్తి లభించినా, సవారి తెగకు మాత్రం ఆ అదృష్టం దక్కదు. సికింద్రాబాద్ శివార్లలో షికింజా మాలిక్ (మోహన్ బాబు) గుప్పిట్లో ఆ వర్గం నలిగిపోతుంటుంది. వారికి ఉనికి లేకుండా చేసే క్రమంలో, ఆ ప్రజల మనుగడకై సమ్మక్క (సోనాలి కులకర్ణి) అలుపెరగని పోరు చేస్తుంటుంది. ఆమె కుమారుడు జడల్ (నాని) ఓ హత్య కేసులో పద్నాలుగేళ్ల కారాగార శిక్ష అనుభవించి బయటకు వస్తాడు. కన్నతల్లిదే లోపమని భావించి ఆమెను ద్వేషిస్తాడు. అనంతరం తన ప్రజల కోసమే ఆమె తన జీవితాన్ని ధారపోసిందని గ్రహిస్తాడు. అదే తరుణంలో షికింజా మాలిక్ వారసుడు విక్రమ్ (రాఘవ్ జుయల్)తో జడల్‌కు వైరం మొదలవుతుంది. ఆ వివాదం చినికి చినికి గాలివానలా మారి పెద్ద మాలిక్ వద్దకు చేరుతుంది. అటుపై ఏం జరిగింది? సవారీల సమర గమ్యం ఏమైంది? వారికి అస్థిత్వం దక్కిందా? అన్నదే మిగిలిన కథ.
స్క్రీన్ ప్లే:
కొన్నిసార్లు సినిమా తీయడానికి కేవలం పిచ్చి ప్యాషన్‌ మాత్రం సరిపోదు దానికి సరిపోయే కథ కూడా ఉండాలి. మెంటలోడు, మొండోడు అనే పేర్లు పడాలి అంటే దానికోసం చాలా కష్టపడాలి. కథలేని సినిమాలు రెండు సంవత్సరాలు కథ పోతే ఫలితం ఎలా ఉంటుందో ఈమధ్య టాక్సిక్ చూపించింది. తాజాగా ప్యారడైజ్ సినిమాతో శ్రీకాంత్ కూడా అదే చేశాడు. ఈయన టేకింగ్ ఫస్టాఫ్‌లో అద్భుతంగా పండింది. ఇంటర్వెల్ కు ముందు వచ్చే సీన్స్ చూస్తే నాని ఖాతాలో మరో హిట్ పక్కా అనిపిస్తుంది. అయితే ద్వితీయార్థంలో మేకర్ గాడి తప్పాడు. ఇంటర్వెల్ బ్యాంగ్ ఇచ్చిన కిక్‌ను తర్వాత కొనసాగించలేకపోయారు.
ముఖ్యంగా తొలి 15 నిమిషాల గ్రిప్పింగ్ నేరేషన్, హీరో ఎంట్రీ అదిరిపోయాయి. హీరోయిన్ కయాదు లోహర్ ట్రాక్ తీవ్ర నిరాశపరుస్తుంది; ఆ ఇబ్బందికరమైన ఘట్టాలను కాస్త మార్చుకుంటే బాగుండేది. సెకండాఫ్‌లో మోహన్ బాబు ఎంట్రీ అదరగొడుతుంది. కానీ అసలైన ఎపిసోడ్ల దగ్గర స్క్రీన్ ప్లే తేలిపోయింది. ఫస్టాఫ్ లో పండిన ఎమోషన్స్ తర్వాత కనెక్ట్ అవ్వవు. దీనికి తోడు పొలిటికల్ యాంగిల్ చొప్పించడం కాస్త ఇబ్బందిగా అనిపిస్తుంది. ముగింపు కూడా పూర్తిగా పాలిటిక్స్ చుట్టూ తిరగడంతో అసంతృప్తి మిగులుతుంది. ఉనికి కోసం సాగే పోరులో ఎమోషన్ లోపించి, కేవలం రక్తపాతం మాత్రమే హైలైట్ అయింది. మాస్ ప్రేక్షకులకు నచ్చే అంశాలు పుష్కలంగా ఉన్నా, వాటిని మరింత బలంగా ప్రెజెంట్ చేసి ఉంటే ఫలితం మరోలా ఉండేది.
నటీనటులు:
జడల్ పాత్రలో నాని జీవించేశాడు. డైరెక్టర్ విజన్‌కు తగ్గట్లుగా నూటికి నూరు శాతం అవుట్‌పుట్ ఇచ్చాడు. చిత్రానికి మోహన్ బాబు ప్రెజెన్స్ అతి పెద్ద బలం. ఆయన్ను ఇంకా సమర్థవంతంగా వాడుకునే స్కోప్ ఉంది. రాఘవ్ జుయల్ తన పరిధిలో మెప్పించగా, సోనాలి కులకర్ణి కీలక పాత్రలో ఒదిగిపోయింది. సంపూర్ణేష్ నటన పర్వాలేదు. కయాదు లోహర్ కనిపించినంత సేపు ఓకే అనిపిస్తుంది. ఇతర తారాగణం తమ పాత్రల మేరకు న్యాయం చేశారు.
టెక్నికల్ టీం:
ఈ ప్రాజెక్ట్‌కు వెన్నెముక అనిరుధ్ రవిచందర్. తన బ్యాక్‌గ్రౌండ్ స్కోర్‌తో ప్రాణం పోశాడు. చాలా సీన్లను తన BGM తో నిలబెట్టాడు. సెకండ్ హాఫ్ మీద ఎడిటర్ నవీన్ నూలి మరింత కత్తెర వేయాల్సింది. విజువల్స్ గ్రాండ్‌గా ఉన్నాయి. దర్శకుడు శ్రీకాంత్ తనకు దక్కిన బంపర్ ఆఫర్‌ను ఇంకా బాగా సద్వినియోగం చేసుకుని ఉండాల్సింది. సెకండాఫ్ ట్రాక్ తప్పకపోయుంటే ఇదో మాస్ బొమ్మ అయ్యేది. అయినప్పటికీ, అదిరిపోయే ఫస్టాఫ్ పుణ్యమా అని బి, సి సెంటర్లలో ఆదరణ దక్కే ఛాన్స్ ఉంది.
ఓవరాల్:
‘ది ప్యారడైజ్’.. అస్థిత్వం కొరకు సాగే అర్థం లేని నెత్తుటి సమరం..!
