ఫ్లాప్ వాళ్లను ఆపలేదు.. రూట్ మార్చేలా చేసింది.. కుర్రాళ్ళూ జాగ్రత్త..!

టాలీవుడ్ బాక్సాఫీస్ దగ్గర ఆడియన్స్ టేస్ట్ ఎంత వేగంగా మారుతుందో చూసి యంగ్ హీరోలందరికీ గట్టి షాక్ తగిలింది. వరుస పరాజయాలు ఎదురుకావడంతో అందరూ ఇప్పుడు ఒకరి తర్వాత ఒకరు సీరియస్ సెల్ఫ్ అనాలిసిస్ మోడ్‌లోకి వెళ్లిపోయి తమ కెరీర్ ప్లానింగ్‌‌ను సమూలంగా రీసెట్ చేసుకుంటున్నారు. ఇందులో ముందుగా చెప్పుకోవాల్సింది డీజే టిల్లు ఫేమ్ సిద్దు జొన్నలగడ్డ గురించే. టిల్లు క్యారెక్టర్‌తో ఓవర్ నైట్ క్రేజ్ తెచ్చుకున్న సిద్దు, ఆ బ్రాండ్ ఇమేజ్ నుంచి బయటకు వచ్చి ఏదో కొత్తగా చేద్దామని ట్రై చేసిన ‘తెలుసు కదా’, ‘జాక్’ లాంటి ప్రాజెక్ట్‌లు థియేటర్లలో తీవ్ర నిరాశను మిగిల్చాయి. దీంతో ప్రేక్షకులు తన నుంచి అసలు ఏం కోరుకుంటున్నారు అనే వాస్తవాన్ని ఆయన గ్రహించారు. తన బాడీ లాంగ్వేజ్‌కు నప్పే అసలైన బలం క్రైమ్ కామెడీ అని గుర్తించి, మళ్లీ ఆ కంఫర్ట్ జోన్‌ వైపే అడుగులు వేస్తూ కొత్త ప్రాజెక్ట్‌లను పక్కాగా లైన్‌లో పెడుతున్నారు.

మరోవైపు ఒకప్పుడు వరుస విజయాలతో దూసుకుపోయి మధ్యలో కాస్త తడబడిన శర్వానంద్ ఇప్పుడు చాలా క్లారిటీతో ప్లాన్ చేసుకుంటున్నారు. రొటీన్ కమర్షియల్ హంగామా జోలికి వెళ్లకుండా, కథా బలం ఉన్న క్లాస్ ఇంకా ఫ్యామిలీ ఎంటర్‌టైనర్స్‌పైనే తన పూర్తి దృష్టి పెట్టారు. ఆ ఆలోచన నిజంగానే వర్కవుట్ అయ్యి రీసెంట్‌గా వచ్చిన ‘నారినారి నడుమ మురారి’ సినిమాతో బాక్సాఫీస్ దగ్గర మంచి హిట్ కొట్టి మళ్లీ ఫామ్‌లోకి వచ్చేశారు. ఈ పాజిటివ్ వైబ్‌తోనే రాబోయే సంక్రాంతి బరిలో దిగేందుకు పక్కా స్కెచ్ వేశారు. వింటేజ్ ఎంటర్‌టైన్‌మెంట్ స్పెషలిస్ట్ శ్రీను వైట్లతో చేతులు కలిపి ‘జార్జ్ క్రిష్’ అనే క్రేజీ ప్రాజెక్ట్‌తో వస్తున్నారు. ఫ్యామిలీ ఆడియన్స్ పల్స్ తెలిసిన శర్వానంద్, మార్క్ కామెడీ టైమింగ్ ఉన్న శ్రీను వైట్ల కలయికలో సినిమా వస్తుండటంతో ఇండస్ట్రీలో దీనిపై మంచి పాజిటివ్ బజ్ కనిపిస్తోంది.

ఉస్తాద్ రామ్ పోతినేని కెరీర్ చూస్తే ఈ సెల్ఫ్ అనాలిసిస్ ఇంకాస్త బోల్డ్‌గా కనిపిస్తోంది. ది వారియర్, స్కంద, ఆంధ్రా కింగ్ తాలూక లాంటి రొటీన్ సినిమాలు వరుసగా నిరాశపరచడంతో రామ్ తన పంథాను పూర్తిగా మార్చుకోవాలని డిసైడ్ అయ్యారు. ఇతరులు రాసే రొటీన్ ఎలివేషన్లు, మూస కథలతో వెళ్తే ఫలితం ఉండదని భావించిన ఆయన, ఏకంగా తానే మెగాఫోన్ పట్టుకోవాలని నిర్ణయించుకోవడం హాట్ టాపిక్ అయింది. ఒక కొత్త తరహా నియో నాయర్ యాక్షన్ డ్రామా కాన్సెప్ట్‌ను సిద్ధం చేసుకుని, ఈ భారీ సినిమాను రామ్ స్వయంగా డైరెక్ట్ చేసుకుంటున్నారు. రామ్ లోని హై వోల్టేజ్ ఎనర్జీని కేవలం రొటీన్ ఫైట్లకు పరిమితం చేయకుండా ఒక ఫ్రెష్ సైన్స్ ఫిక్షన్ బ్యాక్‌డ్రాప్‌లో ఆయనే తెరకెక్కించబోతుండటం కెరీర్‌లోనే పెద్ద టర్నింగ్ పాయింట్‌గా మారే అవకాశం ఉంది.

ఇక వరుసగా దాదాపు అరడజను ఫ్లాపులతో తీవ్రమైన ఒత్తిడిలో ఉన్న యంగ్ హీరో నితిన్ కూడా తన రూట్ పూర్తిగా మార్చేశారు. గత కొంతకాలంగా హిట్ కోసం ఆరాటపడుతూ తన స్క్రీన్ ఇమేజ్‌కి సరిపడని హెవీ మాస్ కథలను ఎంచుకుని ఎదురుదెబ్బలు తిన్న నితిన్, చివరకు తన హోమ్ పిచ్ అయిన ఫీల్ గుడ్ లవ్ స్టోరీల వైపు టర్న్ తీసుకున్నారు. అందులో భాగంగానే ‘అలియాస్ రుక్మిణి’ అనే క్యాచీ టైటిల్‌తో ఒక ఫ్రెష్ లవ్ డ్రామాను సెట్స్ పైకి తీసుకెళ్లారు. ఈ చిత్రానికి దండోరా ఫేమ్ మురళీకాంత్ దర్శకత్వం వహిస్తుండగా, నేచురల్ స్టార్ నాని తన సొంత బ్యానర్ వాల్ పోస్టర్ సినిమాపై నిర్మాతగా వ్యవహరిస్తుండటం విశేషం. నాని నిర్మాణ విలువలపై ఉండే నమ్మకం, నితిన్ మార్క్ రొమాన్స్ కలవడం ఈ ప్రాజెక్ట్‌పై అందరిలో సరికొత్త ఆసక్తిని రేకెత్తిస్తోంది.

మాస్ కా దాస్ విశ్వక్ సేన్ కూడా పలు ప్రయోగాలు చేసి చూసిన తర్వాత తిరిగి తన ఒరిజినల్ కల్ట్ మీటర్‌‌లోకి రావడం గమనించదగ్గ విషయం. ప్రేక్షకులు తన నుంచి మొదట్లో ఏదైతే రా అండ్ రస్టిక్ నేచర్‌ను ఇష్టపడ్డారో, ఆ కల్ట్ మాస్ రూట్‌లోకి ఆయన మళ్లీ వెళ్తున్నారు. తానే స్వయంగా దర్శకత్వం వహిస్తూ ‘కల్ట్’ అనే పవర్‌ఫుల్ ప్రాజెక్ట్‌ను లైన్‌లో పెట్టారు. కేవలం ఈ మాస్ సినిమాకే పరిమితం కాకుండా, ఒక నటుడిగా తనలోని సరికొత్త వేరియేషన్‌ను చూపించడానికి ‘లెగసీ’ అనే మరో డిఫరెంట్ కాన్సెప్ట్ ఓరియెంటెడ్ చిత్రాన్ని కూడా చేస్తున్నారు. మొత్తానికి టాలీవుడ్ యంగ్ హీరోలు గుడ్డిగా రొటీన్ ఫార్ములాలను నమ్ముకోకుండా, తమ బలాలు ఏంటో తెలుసుకుని స్క్రిప్టులను ఎంచుకుంటుండటం ఇండస్ట్రీకి చాలా మేలు చేసే పరిణామం. ఈ రియలైజేషన్ రాబోయే రోజుల్లో బాక్సాఫీస్ దగ్గర ఫ్రెష్ కంటెంట్‌తో పాటు అదిరిపోయే విజయాలను అందించడం ఖాయం.